الاستشارات المرسلة

السلام عليكم ابني عمره 3 سنوات طلعت برجله بقعه صغيره خشنه ما تاذي ولا تحك بس لونهه مختلف عن الجلد شنو هيه وهل تحتاج علاج

    دكتور : د. ثائر علي حسين 2020-03-26 20:46:05
  • ممكن صوره للمرض على الوتس
    07736325990.

تحية طيبة...
ألم في الركبة القدم اليمين تمزق الوتر الهلالي

    دكتور : د.مفيد الوائلي 2020-03-26 21:08:02
  • تحياتي
    تمارين العضله الرباعيه
    الالتزام
    بعض الادوية.

انا اعاني من تهيج القولون وطبعا شديد جدا في بعض الاحيان عند اكل اكلات معينه يؤدي للالتهاب حاليا اعاني من الانتفاخ الشديد وضيق في منطقة البلعوم وكأنما يوجد فيه شيء متعلق وكذلك اعاني جدا جدا من الحموظة

    دكتور : د.عبد الامير عبد الباري 2020-03-26 21:09:29
  • هذه أعراض التهاب واسترجاع المرئ المزمن أخذ هذا العلاج حاليا واستمر عليه ٦ أسابيع واذا ما تحسنت تحتاج إلى ناظور للمعدة pantoprazole 30 mg قبل العشاء.

السلام عليكم دكتور اني بشرتي دهنيه ومنزعج من الدهون الي بلوجه ممكن دكتور اسم صابونه واصليه الي مع اسم منظف اصلي كذالك ،،، وشكرا

    دكتور : د. فراس فاخر التميمي 2020-03-26 21:10:22
  • استعمل غسول اسمه Acteen gel من شركة Bionike.

سلام عليكم اكلت اليوم حميسة لحم وهسة بطني موتتني من الالم رحت لصيدلية نطاني فورا وبعدة الالم اكو شي ممكنً اعملة

    دكتور : د. مرتضى علاوي جبر 2020-03-27 11:31:39
  • السلام عليكم
    وين مكان الألم
    اكو تقيءلو لا
    اكو إسهال
    وتكدر تأخذ هاذ العلاج
    Pareite 20
    قبل الاكل صباحًا. ومساء
    Anti spasmin حب بعد الاكل
    Malux شراب.

السلام عليكم
عندي الم في اليد اليسرى عمري ٤٠ سنه امرأه وزني ٧٤ كغم وكذلك الألم في رجلي اول مره هاي الحاله تصير عندي
شكرا جزيلا

    دكتور : د.فارس عدنان سعيد 2020-03-27 11:45:49
  • وعليكم السلام
    مدة تعاني من الحالة؟
    توجد امراض مزنمه؟ سكر ضغط ربو قرحه
    هل يرفق الالم خدار وتنمل في اليد؟
    العلاج في الوقت الحالي
    ١.راحة اليد اليسرى
    ٢. تمارين رياضيه بسيط لليد اليسرى والاطراف السفلى
    ٣.loflam tab 100mg
    حبه صباحا ومساء بعد الطعام
    ٤. Norgesic tab
    حبة صباحا ومساء بعد الطعام
    ٥. Radian cream
    ثلاث مرات باليوم
    ٦. Neurobin tab
    حبة صباحا وكساء
    عندكم العافية.

السلام عليكم...
عندي طفله رضيعه تبلغ من العمر ٣٠ يوما
تصير عندها حاله شخير فقط من هيا كاعده
ووهيا نائمه طبيعي تكون بدون شخره
مع العلم استخدمه قطرات تنظيف الانف للاطفال
لكن بدون فائده ولا تزال الشخره موجوده
مع فائق الشكر والتقدير

    دكتور : د.مروج عبد العالي 2020-03-27 17:32:07
  • السلام عليكم
    هذا الصوت طبيعي من انف الطفل ومايحتاج الى قطرات ويقل بتقدم العمر
    وارجو الانتباه الى اللهات اذا كان فيها فتحه او لا
    اما اذا كان الصوت صادر من البلعوم فهذي رخاوه بالحنجره وايضاً ان شاء الله تقل وتختفي بتقدم العمر.

السلام عليكم. عندي زوجتي العمر٣٨ سنه مسويه عمليةرفع المراره. صار عده ألم أسفل الظهر اعتقد الفقره العجزيه (العصعص) بحيث ماتكدر تحني ظهره وإذا نايمه ماكو ألم وسابقا عده كان بداية سوفان بالرقبه.

    دكتور : د.مفيد الوائلي 2020-03-28 16:50:30
  • وعليكم السلام
    تستعمل بعض المسكنات لحين اجراء الفحص الشعاعي.

السلام عليكم اسف ع الازعاج
كيس دهني بمفصل اليد
قبل فترة راجعنة عليه دكتور سحب السائل من عنده
و رجع مره ثانية نفس قبل
شنو علاجة و شنو اسباب هذا الكيس
تحياتي لكم بوركت جهودكم

    دكتور : د.فارس عدنان سعيد 2020-03-27 14:20:47
  • وعليكم السلام
    اذا كان الكيس صغير و لا توجد مضاعفات مثل ضغط على العصب او الاوعيه الدموية او يعيق حركة المفصل فلا يوجد داعي للتداخل الجراحي
    العلاج
    ١.تقليل الحركة والاجهاد المفصل الذي توجد فيه ااكيس
    ٢. استعمال مسند للمفصل الذي فيه كيس
    ٣. اخذ مسكنات في حالة وجود الالم
    Loflam 100mg
    حبة صباحا ومساء
    ٤. Olfen gel
    ثلاث مرات باليوم.

السلام عليكم ورحمة الله وبركاته
قبل أسبوع تحول حساسية الحلق عندي الى التهاب في الحلق او اللوزتين أو البلعوم اشعر بالالم قوية جدا اثناء
بلع الريق ارتفاع درجه الحرارة بشكل خفيف احس كأنما يوجد ملح على جرح طري تم اخذ علاج التهابات البلعومamoklavin-BID
1000mg
تم التحسن لمده يومين بعد انتهاء العلاج الحاله عاودتني بنفس الالم
ومرارة في الطعم ايقظني من النوم وعندي حكه في البلعوم وايضا ارتجاء معوي (غثيان) أخذت من الصيدلية علاج الحساسية phenadone مع العلم يوميا اشرب الماء والعسل والليمون والغرغرة بالماء والملح وشرب كميات من الماء الدافئ
وشكرا على جهودكم المباركة

    دكتور : د.امجد قدوري الياسين 2020-03-26 21:48:50
  • No question.

مرحبا عندي والدتي تأخذ أبر بايولوجي وحاليا خلصن ابرها هي تستلم من مستشفى مرجان بالحلة وصار حظر وخلصن ابرها فشلون ممكن نحصلهن لأنه حالته تعبانه وممنونه من حضرتك مقدما

    دكتور : د. مرتضى تركي الابراهيمي 2020-03-27 18:05:07
  • شنو مرضها؟؟.

  • دكتور : د. مرتضى تركي الابراهيمي 2020-03-27 18:05:09
  • شنو مرضها؟؟.

  • دكتور : د. داليا محمد جاسم 2020-04-05 20:58:36
  • شنو نوع الابر البايلوجي اللي تاخذها؟.

بشرتي تعبانه نتيجة استخدام كريم وتركته. وعاني من تقشر وأحمرار للبشرة وأسمرار .

    دكتور : د.كاظم الربيعي 2020-03-27 09:49:30
  • تحتاج ترسل صور او تنشاف.

السلام عليكم
قبل يومين سقطت علي السيراميك وكان سقوطي على الجهة الامامية اليمنى من الرأس في حينها جلست ولكن عندي فقدان ذاكرة مؤقت لمدة ساعة تقريبا بعد الحادثة وكدمة قوية في مكان الضربة الاشعه اضهرت عدم وجود اي فطر بالجمجمه ولله الحمد ولكن بعد يوم من الحادث الورم نزل على عيني اليمنى واصبح عندي انتفاخ حول العين وسواد وتضخم تحتها واصبحت العين حمراء من الجهة اليمنى ..
سؤالي هل نزول الورم الى العين طبيعي ؟ وهل هناك علاجات تتفضلون بوصفها لي لتخفيف الورم حول العين والاحمرار في العين ؟
شكرا لكل من ساهم في هذا العمل الكريم

    دكتور : د. احمد قاسم 2020-03-28 07:50:17
  • عليكم السلام
    يرجى توجيه السؤال إلى اختصاص جراحة الجملة العصبية
    أهلا وسهلا.

سلام عليكم مشكلتي شعري هواي جاي يتساقط وحتى حواجبي هم يطيح منهم شعر وانه جاي اسوي رجيم وفقط وجبتين ريوك وغدى وصارلي سبوعين اخذ فيتامينات شراب اسمه multivitamin بس مجاي اشوف تحسن عندي وهواي خايفه من تساقط شعري صار فراغات كدام ومخوفني اكثر حواجبي يطيح منهم شعر

    دكتور : د. فراس فاخر التميمي 2020-03-27 09:45:43
  • يحتاج اجراء تحاليل عامه للدم خاصة نسبة الحديد والزنك وفيتامين D3
    هذا على شرط انو ماعندك اضطرابات هرمونيه او عدم انتظام الدوره الشهرية.

انا عندي مثل الوحمه بضهري بس مو ولاديه صار تقريبا سنتين بضهري واستعلمت ادويه مجاي تروح وجاي احسها تكبر رادت مني الدكتوره اخذ عينه منها ماقبلت خفت
لونها جوزي مايل للاسود وبيها قلييييل حبوب وشكلها مثل الحرق

    دكتور : د. فراس فاخر التميمي 2020-03-27 09:46:46
  • تحتاج معاينه وفحص واذا كانت وحمه حسب قولك فيمكن رفعها بالليزر.

سلام عليكم مشكلتي شعري هواي جاي يتساقط وحتى حواجبي هم يطيح منهم شعر وانه جاي اسوي رجيم وفقط وجبتين ريوك وغدى وصارلي سبوعين اخذ فيتامينات شراب اسمه multivitamin بس مجاي اشوف تحسن عندي وهواي خايفه من تساقط شعري صار فراغات كدام ومخوفني اكثر حواجبي يطيح منهم شعر

    دكتور : د. فراس فاخر التميمي 2020-03-27 09:47:04
  • نفس الإجابة أعلاه.

مغص بطن الطفل .عمره اربع اشهر

    دكتور : د.مروج عبد العالي 2020-03-27 19:12:07
  • السلام عليكم
    هاي طبيعيه وماتحتاج الى شي تخف ويه تقدم العمر اما اذا زادت وصاحبها تقيء او قلت الرضاعه او اي علامات اخرى هنا نحتاج الى علاج وفحوصات اذا لم تتم الاستجابه للعلاج
    ان شاء الله السلامه
    ممكن دهن وتدليك البطن بزيت زيتون دافيء للتقليل من الام الغازات.

السلام عليكم انا اعاني من مرض جلدي ابتداء من رأسي وبالتالي انتشر بجسمي كله رحت الاكثر من دكتور وماكو فايده اكثر الدكاتره يكولون هذه صدفيه وما اعرف شنو الحل وبهذه الفتره زاد واذا ما اصور الك الحاله. صعبه التشخيص والبرنامج الي مسويه ما في هاذي الخاصيه مع الشكر

    دكتور : د. فراس فاخر التميمي 2020-03-27 09:49:00
  • اذا التشخيص داء الصدفيه المنتشر
    بالامان علاجها اما بواسطه العلاج البايولوجي او الكيمياوي او بواسطه اشعة بوفا بالإمكان مراجعتك لإحدى مستشفيات المركز ماعدا الجمهوري.

سلام عليكم يوجد لدي الام في المفاصل الأيدي تؤلمني وتتشنج والارجل أيضا فيها خدار يحدث عند الضغط عليها والأم في الأكتاف والضهر مستمره منذ فتره طويله ولاكن أصبحت حاده في هذه الأيام (العمر 26سنه) وشكرا ارجو الرد

    دكتور : د.فارس عدنان سعيد 2020-03-27 11:38:00
  • وعليكم السلام
    كم المدة التي تعاني من الخدحاله؟
    هل توجد امراض مزمنه كل سكر ضغط ربو قرحه قلب؟
    تحتاج بعض التحاليل الدم.
    العلاج في وقت الحالي
    ١.تمارين رياضيه تقويه العضلات
    خصوصا المشي
    ٢. Mobic tab
    حبه صباحا ومساء
    ٣. Neuronbin tab
    حبة صباحا ومساء
    ٤. Fluoxitine tab 20
    حبه صباحا
    ٥.Kanagesic tab
    حبة صباحا ومساء
    عندكم العافية.

السلام عليكم
عندي زوجتي عدهه التهاب بالاذن الوسطى وثقب بطبلة الاذن( الاذن اليمنى) والعام سوت عمليه بايران مال ترقيع ومانجحت وهسه هي حامل وجااي تشكي من راسهه ودائما دايخه والجهه اليمنى لراسهه وعينهه دائما تشكي من صداع ،اكو علاج تكدر تاخذه يخفف الالم والالتهاب ،علما اني راجعت د احمد العباسي بداية الحمل وانطاني بس قطرات واموكسيل مال التهاب ،وجاي نخلي منهه ،بس هالصداع والدوخه ملازماتهه ،اضافه الى ضغطها جاي يهبط بين فتره وفتره
علما ان زوجتي عمرها 30
ممكن تفيدوني بعلاج او وصفه تخفف الالم والصداع اني ادري هي مايصير تاخذ علاج خلال فتره الحمل ،وهي هسه بشهر السابع
شكرا جزيلا واسف عالاطاله

    دكتور : د.حيدر صيوان المالكي 2020-03-27 10:13:26
  • شكرا لاستشارتكم
    الشهر السابع من الحمل ممكن استخدام الادويه..
    لاننسئ تغيرات الحمل وانخفاض نسبة الهيموغلوبين بالدم وتغيرات الضغط ممكن ان تسبب هاي الاعراض مثل الدوخه والصداع وانخفاض ضغط الدم.
    اضافة حب بندول للعلاج مرتان يوميا
    حب فاليوم عند الحاجه ليلاً.
    تمنياتي بالشفاء..